1 Star2 Stars3 Stars4 Stars5 Stars (No Ratings Yet)
Загрузка...
78 views

Игидэйгэ библиотека сайдыыта

Үтүмэн үгүс үйэлэр тухары киһи- аймах муспут бараммат баайа түмүллүбүт уйата- кинигэ. Кинигэлиин доҕордоспут сүүтүк да саҕаны сүүттэрбэт, сөкүүндэни даҕаны кураанахха сүтэрбэт, бастаахтарга баһыйтарбат, «өйдөөхтөрү» өрө көрдөрбөт, киһи киэнэ кэрэмэһэ, Саха киэнэ саарына кини буолар

Ааҕар балаҕан Игидэй нэһилиэгэр  1939 сыллаахха кулун тутар  19 күнүттэн Кузьмина Пелагея Гаврильевна аһан нэһилиэккэ үлэлэппитэ. Ол кэмҥэ кинигэ олус күндү этэ, онон үгүс дьоҥҥо дорҕоонноохтук ааҕарын ахтан кэпсииллэр. Нэһилиэнньэни ааҕарга, суруйарга үөрэтэр сорук ыччаттарга уонна үөрэхтээх учууталларга сытыытык турбут кэмэ этэ.

Бу  кэмтэн  ыла  ааҕар  балаҕаны  комсомол секретара  биригэдьиирдэр  нэһилиэк Советын үлэһиттэрэ  ферманы, от үлэтин  кэмигэр  отчуттарга, араас  мунньахха  дьон  түмсэр  сиригэр сонуну тарҕатааччы буолан үлэлэппиттэрэ. Анал дьиэ, ыскаап диэн  суоҕа, салайааччы  остуолугар  долбууругар ууруллар аҕыйах кинигэ  этэ диэн  элбэх  ахтыыттан  билэбит. Ол да  буоллар нуучча,  саха  суруйааччыларын айымньыларын активнайдык  ааҕан,  кэпсээн  дьон-сэргэ  ортотугар иһитиннэрбит  үтүөлээхтэр, элбэх  киһини ааҕарга-суруйарга  үөрэппиттэрэ  биллэр.

 

Ааҕар  балаҕан үлэһиттэрэ:

  1. Кузьмина Пелагея  Гаврильевна  —  1939 с.
  2. Слепцов Алексей Софронович    — 1940 с.
  3. Матаннанов Влас Константинович – 1941 с.
  4. Иванов Константин  Яковлевич     — 1941 с.
  5. Охлопков Николай Иванович       — 1941 с.
  6. Лопатина Александра  Николаевна – 1941-42 сс.
  7. Матаннанов Константин Власьевич – 1942 с.
  8. Максимова – Ермолаева Елена  Архиповна – 1943 с.
  9. Захаров Гаврил  Алексеевич  —  1943 с.
  10. Егоров  Семен Ефимович      — 1944-46 сс.
  11. Кузьмин  Иван Константинович – 1947 с.
  12. Андросов  Петр  Дмитрьевич   —  1948 с.
  13. Павлов Семен  Дмитрьевич     —  1948 с.
  14. Никифоров  Семен  Назарович – 1949 с.
  15. Ермолаева  Елена  Архиповна   —  1949 с .
  16. Павлова Анисия  Николаевна   —    1950 с .
  17. Марков Михаил Дмитрьевич   —   1951 с.
  18. Никифоров Николай Семенович – 1952 с.
  19. Аргунова  Анастасия   Гаврильевна  1954 с.  — Кулаадаҕа
  20. Андросова Мария Васильевна  — 1954 с.
  21. Унарова Анна Семеновна  1956 с.  Туора — Күөлгэ уонна Дэбдиргэҕэ.

 

Олох сайдан барбыта Игидэйтэн бастакы библиотекарь идэтин ылбыта Анастасия Гаврильевна Аргунова. Кини  Кулаадаҕа биир сыл ааҕар балаҕаҥҥа үлэлээбитэ. Андросова Мария Власьевна, Унарова Анна Семеновна Игидэй нэһилиэгэр үлэлээбиттэр. Туора-Күөллүүн биир салалтаҕа буолан икки нэһилиэгинэн сылдьарбыт диэн ахталлара. Ол гынан баран, культура управлениятынан сельскэй библиотека 1956 с. эргэ кулуупка, хонтуора буолбут өртүттэн биир хоһу ылан учуутал  үөрэхтээх Егоров Семен Ефимович олохтоохтук аһан үлэлэппитэ. Семен Ефимович нэһилиэнньэҕэ үлэтин таһынан кулуупка драмкуруһуок аһан үгүс Саха суруйааччыларын  айымньытын  туруоран умнуллубат  биһирэбили ылбыта.

Дьиҥнээх библиотекарь идэлээх Анна Яковлевна Маркова ылыаҕыттан библиотека библиотечнай классификация быраабылатынан ууруллан сайдан–кэҥээн үс хоһу баһылаан турбута, кэлиҥҥи  сылларга эргэ хонтуораны  барытын баһылаабыта, 2005 сылтан анал  улахан дьиэҕэ көһөн тахсан, компьютердаах, видеодвойкалаах уонна телефоннаах 15 тыһыынча кинигэлээх 500 ааҕааччылаах, сыллата былааннаах үлэтин толоро турар тэрилтэ буолбута.

 

Сельскэй   библиотека  үлэһиттэрэ:

 

  1. Егоров Семен Ефимович  —  1956-1967 сс.
  2. Маркова Анна Яковлевна —  1967-1982 сс.
  3. Заболоцкая Федора Васильевна – 1982-83 сс.
  4. Тимофеева Любовь Гаврильвна — 1983-84 сс.
  5. Максимова Анастасия Прокопьевна – 1984-1986 сс.
  6. Заболоцкая Федора Васильевна 1986-2016 сс.

 

Таатта улууһун «Бастыҥ библиотекарь» анал аат хаһаайката тыыл ветерана Анна Яковлевна Маркова үлэлиир кэмигэр бастыҥ үлэлээх библиотека буолан «Оройуон чемпиона»,  «Коммунистическай үлэ ударнига», «Бочуог дуоскаҕа» хаста да үрдүк кирбиилээхтик үлэлээн тахсыбыта. 1978 с. Бэһис республиканскай культура  үлэһиттэрин съезтэригэр Дьоккуускайга кыттар чиэскэ тиксэн  сылдьыбыта. Кини үлэлиир кэмигэр зонанан үлэ күүскэ барара, лекторскай бөлөхтөрү  сыллата партиялаахтар салайан үлэлэтэллэрэ, агитационнай үлэ  күүскэ  ирдэнэрэ, ферманан, отчуттарынан передвижка, кыһыл  муннук тэриллэн оҥоһуллара.

Пенсияҕа тахсан баран Госстрахха уонча сыл үлэлээбитэ, олоҕун устата иис дьарыгы аргыс оҥостубут буолан сахалыы иискэ умсугутуулаахтык тигэн элбэх быыстапкаҕа кыттан сыралаах үлэтин түмүгүнэн норуот маастарыгар тиийэ үүммүтэ.

Библиотекарь Федора Васильевна Заболоцкая 1982 сылтан  сэбиэдиссэйинэн үлэлээбитэ, анал библиотекарь  үөрэхтээх–общественнай тэрилтэлэргэ тирэҕирэн «Сельскэй библиотека–нэһилиэнньэ информационнай киинэ» — диэн  программанан  салайтаран 2002 сылтан үлэлэппитэ.  Үлэни «Дьүөгэ» женсовет комитетын, «Сыккыс» краеведческай кулууп   түмсүүлэрин, «Саҥа кэм» — диэн социальнай киинэ  тахсар  хаһыат  редакциятын  чилиэннэринэн  киирэн, үлэни ону  кытта дьүөрэлии былааннаан үлэлэтэрэ, ону таһынан  СДК уонна оскуола  иһинэн ыытыллар араас  маассабай үлэлэргэ уонна конкурстарга кыттыһан ыытара.

 

2016 с. библиотека сэбиэдиссэйинэн Жулева Кристина Алексеевна үлэлиир. Арктикатааҕы культура уонна искусство институтун библиотечнай салаатыгар үөрэнэн «Библиотечно-информационная деятельность» идэтин ылбыта. 2017 с. библиотека иһинэн «Иэйии» литературнай түмсүү үлэлиир. Тэрийээччи  СӨ Үтүөлээх учуутала Андросова Любовь Васильевна . Түмсүү чилиэнэ, хоһоонньут М. М. Спиридонова хоһооннорун хомуруунньугун бэчээттэтэн таһаарбыттара. Литературнай биэчэрдэри, үбүлүөйдээх суруйааччыларга аналлаах араас тэрээһиннэри, олохтоох автордары өйүүр сыаллаах үлэлииллэр. 2021-2024 сс. түмсүүнү СӨ үөрэҕириитин туйгуна Матаннанова М. П. салайбыта. 2023 с. «Иэйии биһигэ» диэн түмсүү кыттыылаахтарын хоһооннорун хомуурунньугун бэчээттэтэн таһаарбыттара. 2024 с. түмсүүнү Жулева А.С.-Суһума салайар.

Саҥа кэм ирдэбиллэрин батыһан библиотека туспа сайт, инстаграмм страница арыйан үлэлэтэр, ааҕааччыларын араас көрүҥүнэн хабар.