Загрузка...Бүгүн олохтоох библиотекаҕа төрөөбүт тыл, сурук-бичик күнүгэр анаммыт тэрээһин ыытылынна. Ол курдук, хамаандалар икки ардыларыгар «Толкуйдаа. Оонньоо. Кыай.» өй оонньуутугар барыта 4 хамаанда күрэхтэстэ. Оонньуу уопсайа 5 түһүмэхтээх (1. тыл күнүгэр аналлаах викторина, 2. бэргэн этиини таайыы, 3. өс хоһооннорун ситэрии, 4. саха суруйааччылара, 5. Улуу Кыайыы 80 сыла). Тыҥааһыннаах оонньуу түмүгүнэн 1 миэстэ-«Оһуор тойуга»(Нехчоенова О.И., Ефимова М. Н.), 2 миэстэ-«Оһуор тойуга» (Алексеева М. И., Ордахова С. Ф.), 3 миэстэни эрэллээхтик «Эр хоһууттар» (Попов В.В., Попов В.Н.) хамаандалара буоллулар. Кыайыылаахтар Добун суруктарынан, кыттааччылар туоһу суруктарынан бэлиэтэннилэр.
Тэрээһин иккис аҥарыгар сылын аайы ыытыллар өрөспүүбүлүкэтээҕи «Сахалыы дьыктаан» аахсыйаҕа кыттан, буойун суруйааччы Тимофей Сметанин «Кыайбыттар ыһыахтара» кэпсээниттэн быһа тардыыны суруйдубут. Дьыктааны саха тылын уонна литературатын учуутала Галина Владимировна Лопатина суруйтарда. Хас биирдии кыттааччы туоһу суругунан бэлиэтэннэ, кыайыылаахтар анал ааттарынан наҕараадаланнылар.
«Бастыҥтан бастыҥ суруксут» — Мотрена Николаевна Ефимова, «Бастыҥ суруксут»- Светлана Федоровна Ордахова уонна «Үчүгэй суруксут» — Владимир Владимирович Попов буоллулар.
Бары кыайыылаахтарга, кыттааччыларга истиҥ эҕэрдэ, барҕа махтал.
Бу курдук сэргэхтик төрөөбүт тыл, сурук-бичик күнүн бэлиэтээтибит. Туругурдун төрөөбүт төрүт тылбыт!