Загрузка...РСФСР үөрэҕириитин туйгуна, үлэ тыыл бэтэрэнэ, Игидэй, Чымынаайы нэһилиэктэригэр салайар үлэҕэ үлэлээбит, Афанасий Константинович Иванов төрөөбүтэ 90 сылын Игидэй нэһилиэгэ өрө көтөҕүллэн, киэҥ далааһыннаахтык бэлиэтээтэ. Ол курдук, ииппит кыыһа Миралюба Манчаровна Иванова-Саморцева ыраахтан-чугастан Афанасий Константинович бииргэ төрөөбүттэрин оҕолорун, сыдьааннарын, аймах-билэ дьонун Хаҥаластан, Тааттаттан, Томпоттон, Намтан түмэ тардан аҕалан төрөөбүт дойдутугар Игидэйгэ үйэтитии, убайдарыгар сүгүрүйүү тэрээһинин ыытыстылар.
Э.К.Пекарскай аатын сүгэр орто оскуолаҕа А.К.Иванов аатынан химия кабинетын аһыллыытын үөрүүлээх линейката буолан ааста. «Вита» МХ өрөспүүбүлүкэ иһинэн викторина оонньууну ыытта. Салайааччы Сунхалырова З.А.
История, обществознание нэдиэлэтигэр 5-8 кылаастарга квест оонньуу, 8-11 кылаастарга өйү-санааны сайыннарар оонньууну-история учуутала, Иванова Саргылаана Алексеевна иилээн-саҕалаан ыытта.
«Хоһоон хонуута» бөлөҕүнэн уонна биирдиилээн хоһоон, үгэ ааҕыытын күрэһин сүрүннээтэ : Ефимова Варвара Константиновна-саха тылын уонна литературатын учуутала.
В.П.Андросов аатынан КСК-ҕа Мотрёна Константиновна Иванова аатыгар нуучча дуобатыгар түөлбэлэр икки ардыларыгар аһаҕас турнир ыытылынна.
Күрэхтэһиини тэрийдэ-КСК директора Габышев З.В. Сүрүн судьуйанан үлэлээтэ Иванов Манчаары Константинович орто кыыһа Бурцева Аграфена Манчаровна.
А.Ф.Бояров аатынан норуот айымньытын дьиэтигэр аймахтарын кытта атах тэпсэн олорон төгүрүк остуол ыытылынна.
Кыттыыны ыллылар: Н.Е.Сыромятников- Саха сирин адвокаттарын коллегиятын чилиэнэ, Георгий Александрович Малышев-Саха сиринээҕи анал байыаннай дьайыыга кыттыбыт бэтэрээннэр союзтарын оркестрын бэрэсэдээтэлэ.
Елена Семёновна Владимирова-Тыа хаһаайыстыбатын наукатын кандидата.Бурдук сиэмэтин селекциялыыр бөлөҕүн салайааччыта.
Афанасий Константинович оҥорбут үтүөтүн сиэн аймахтара истиҥник-иһирэхтик ахтан-санаан аастылар.
Маны таһынан Жулева Александра Семёновна салайааччылаах ахтыы киэһэтэ ыытылынна. Афанасий Константинович үөрэппит үөрэнээччилэрэ, салайбыт кылааһын оҕолоро кэлэн истиҥ-иһирэх тылларынан учууталларын ахтан, тэрээһини улаханнык киэргэттилэр.
Аймахтар уонна нэһилиэк олохтоохторо кыттыылаах сэргэх, олус үчүгэй кэнсиэр буолла.Кэнсиэри салайан ыытта Атласова Лариса Петровна-СӨ үөрэҕириитин туйгуна, РФ үөрэҕириитин бочуоттаах үлэһитэ, Хаҥалас улууһун уус-уран самодеятельноһын бэтэрээнэ.
Көмүс куоластаах Ирина Васильевна Протопопова ырыатын көрөөччүлэр олус биһирээн, астынан иһиттилэр.
Сыана бэтэрээнэ В.Ф.Марков үҥкүүтүн көрөөччүлэр дохсун ытыс тыаһынан көрүстүлэр. Максимова Владелена саксафоҥҥа оонньуута улахан сэҥээриини ылла.
Элбэх нарын, иэйиилээх ис сүрэхтэн тахсар ырыа ылланна.
Тэрээһин түмүгэр А.К. Иванов сыдьааннара кыайыылаахтарга олус элбэх бэлэх-туһах туттардылар. Кыайыылаахтар оҕотуттан улаханыгар диэри үөрүүлэрэ үксээтэ. Кыратык сэгэтэн сырдаттахха:
Захаров Николай Романовичка спорт ыарахан көрүҥэр утумнаахтык дьарыгырар спортсмеммытыгар-Манчаары Константинович Иванов оҕолорун-сиэннэрин ааттарыттан саха быһаҕын бэлэх ууннулар. Аграфена Константиновна кэргэнэ — Бурцев Константин оҥоһуга.
Эдьиийдэрин Татьяна Константиновна кыыһын, Екатерина Вячеславовна Обутова бирииһин А.К.Ивановы кытта уһун сылларга дьаһалтаҕа бииргэ үлэлээбит коллегатыгар, Любовь Ивановна Варламоваҕа туттардылар.
Бу курдук, Игидэйтэн төрүттээх сүдү киһибит А.К.Иванов төрөөбүтэ 90 сылын үөрүүлээхтик бэлиэтээтибит.
Варвара Ефимова-
СӨ үөрэҕириитин туйгуна, «Учууталлар учууталлара», «СӨ бастыҥ сүбэһитэ» бэлиэ хаһаайына, Таатта хаһыат общественнай кэриспэдьиэнэ.