1 Star2 Stars3 Stars4 Stars5 Stars (2 votes, average: 3,00 out of 5)
Загрузка...
199 views

Былатыан Ойуунускай төрөөбүтэ 130 сыла

Бүгүн сэтинньи 11 күнэ бүтүн саха норуотугар үөрүүлээх күн – Саха автономиятын төрүттээччилэртэн биирдэстэрэ, республика бастакы салайааччыта, ССРС Үрдүкү Сэбиэтин бастакы ыҥырыылаах мунньаҕын депутата, Саха АССР үрдүкү Сэбиэтин бастакы бэрэссэдээтэлэ, Саха сэбиэскэй уус-уран литературатын төрүттээбит суруйааччы, уһулуччулаах политическай диэйэтэл, лингвист-учуонай, наука салайааччыта, улуу убайбыт Платон Алексеевич Ойуунускай төрөөбүтэ 130 сыла.

«Дьулуруйар Ньургун Боотур» — сахалар киэҥ туттар, биир киэнник тарҕаммыт уонна биһиринэр айымньы буолар.

Бу олоҥхону аан бастаан XIX үйэ иккис аҥарыгар Игидэй нэһилиэгин киһитэ олоҥхоһут, тойуксут Константин Георгиевич Оросин 1895 сыллаахха сурукка киллэрбитэ

Кини суруйбут тексин тылын уһулуччулаах чинчийээччитэ Эдуард Карлович Пекарскай 1907 сыллаахха Петербурга бэчээттэтэн таһаарбыт.

«П. А. Ойуунускай Дэбдиргэ5э сылдьыбыта» диэн ыстатыйаны П. Андросов 1971 сыллаахха  «Сардаҥа» холкуос бэрэссэдээтэлэ Яков Николаевич Горбунов ахтыытыттан «Сыдьаай» диэн илиинэн суруллан тахсар сурунаалга бэчээттэппитэ.

Онтон Я. Я. Никифоров диэн Дэбдиргэттэн төрүттээх худуоһунньук П. Ойуунускай мэтириэтин уруһуйдаабыта.

Тыыл, советскай-партийнай үлэ бэтэрээнэ, Игидэй нэһилиэгин бочуоттаах олохтооҕо А. Г. Аргунова П. Ойуунускай кынаттаах тылларын күрүчүөгүнэн тиһэн панно оҥорон хаалларбыта.

Олохтоох хоһоонньут М. М. Спиридонова П. Ойуунускайга анабыл хоһооно

Улуу Убайбыт

Тааттам сирэ-мин дойдум

Улуу убайбыт төрөөбүт түөлбэтэ,

Биир ситим, биир кэс тыл

Умнуллубат үйэлэргэ.

Тохтоон көрөн ааһабын

Болуоссат иһигэр туран,

Тугу эрэ ырааҕы толкуйдуурдуу

Тыыннаах бэйэҕин көрбүттүү…

Хараҥаҕа хаайтарбыт

Хараҥа кэмнэргэ,

Сырдык күн кэриэтэ

Сырдата тыкпыта.

Үөрэҕи билбэтэх

Ыччаты тумэттээн,

Үөрэх диэн тугун

Хараҕын аспыта.

Сүллэр этиҥ буолан

Баайдартан былдьаттаан,

Тиийиммэт-түгэммэт

Норуокка биэрбитэ.

Ол быдан дьылларга

Будулҕан сылларга,

Түөскүнэн көрсүбүтүҥ

Көҕүскүнэн сүксүбүтүҥ.

Былыргыттан саҕалаан

Быыһык кэмнэргин,

Уйан-тулуйан

Баччаҕа кэллэҕиҥ.

Убайбыт кэс тылын

Толорор туһугар,

Ыччаппыт дьулуһар

Өрөгөйдүү туойар.

Оо, бырастыы, Улуу убайбыт!

Билиҥҥи көлүөнэ дьоҥҥуттан,

Махтал улаханын этэбит

Бу манна олорон ааспыккар!

Саха буолан тураммыт

Өрүү кырдьыгы өрө тутуохпут,

Саҥа сайдыынан салаллан

Кэс тылгын толоруохпут!

Тааттам сирэ-мин дойдум

Улуу убайбыт төрөөбүт түөлбэтэ,

Биир ситим, биир кэс тыл

Умнуллубат үйэлэргэ.

 

 

Добавить комментарий

Ваш адрес email не будет опубликован. Обязательные поля помечены *