1 Star2 Stars3 Stars4 Stars5 Stars (2 votes, average: 2,50 out of 5)
Загрузка...
439 views

Игидэй нэһилиэгэр саҥа кинигэ сүрэхтэннэ

Олунньу 16 күнүгэр А. Ф. Бояров аатынан норуот айымньытын дьиэтигэр биир дойдулаахпыт, Саха Өрөспүүбүлүкэтин муниципальнай сулууспатын туйгуна, «Игидэй нэһилиэгин социальнай-экономическай сайдыытыгар кылаатын иһин» бэлиэ хаһаайына, Өрөспүүбүлүкэтээҕи «Иэйии» коммерческайа суох тэрилтэ, улуустааҕы «Уран тыл» литературнай түмсүү кыттыылааҕа, айар куттаах Александра Жулева-Суһума араас кэмнэргэ уус-уран күрэстэргэ кыттыбыт кэпсээннэринэн тахсыбыт «Эйиэхэ» диэн кинигэтин биһирэмэ  буолан ааста.

Александра Жулева-Суһума бэйэтэ айар үлэтин төрөөбүт дойдутун дьонугар-сэргэтигэр арыйан, сырдатан, хайдах айар эйгэҕэ үктэммитин, үгүс күрэстэргэ кыттан, ситиһиилэнэн онтон кынаттанан бастакы кэпсээннэрин хомуурунньуга күн сирин көрбүтүн туһунан сиһилии  кэпсээтэ.

Кинигэ сүрэхтэниитигэр Александра Жулева биир дойдулаахтара, бииргэ үөрэммит доҕотторо, араас кэмҥэ алтыспыт үөлээннээхтэрэ, аймахтара, оҕолоро уонна Таатта улууһун киин библиотекатыттан, «Уран тыл» литературнай түмсүүттэн айар куттаах доҕотторо кэлэн кинигэ тахсыбытынан истиҥ эҕэрдэ тылларын анаатылар.

Тэрээһиҥҥэ автор кинигэҕэ киирбит кэпсээннэрин анаан аахпыт дьон – Игидэй нэһилиэгин аҕа баһылыга Марков Е.А., биир дойдулаахпыт, СӨ норуотун маастара Лопатин А. П., И.А. Аргунов аатынан киин библиотека библиографа Шестакова Е. И.,  уо.д.а. кэлэн ырыппыттара, санааларын тиэрдибиттэрэ мустубут дьон болҕомтотун тарта.

Тэрээһин биир бэлиэ түгэнинэн кинигэҕэ киирбит «Оһохтоох сайылыкка» кэпсээҥҥэ олоҕурбут Александра Жулева бэйэтэ туруорбут дьүһүйүүтэ дьон-сэргэ сэҥээриитин ылла.

Cаҥа айар эйгэҕэ киирэн эрэр биир дойдулаахпытыгар үгүс ситиһиилэри, айар, суруйар талаана өссө да арыллан үрдүк чыпчааллары дабайарыгар баҕарабыт.

Добавить комментарий

Ваш адрес email не будет опубликован. Обязательные поля помечены *