ССРС спордун маастара, Манчаары Баһылай бирииһигэр спартакиада хапсаҕайга бастакы абсолютнай чемпиона Андросов Владимир Петрович төрөөбүтэ 75 сыла

Быраатым туhунан иhирэхтик

Тустууга ССРС уонна Саха АССР спордун маастара Андросов (Арылахов)Владимир Петрович 1947 сыл бэс ыйын 17 күнүгэр Ытык-Күөлгэ төрөөбүтэ. Аҕата Петр Константинович Арылахов Аҕа дойдуну көмүскүүр Улуу сэрии кыттыылааҕа, үс төгүл «Хорсунун иhин» мэтээлинэн, «Туйгун минер» диэн знагынан, элбэх бойобуой мэтээллэринэн наҕараадаламмыта. Ийэтэ Анна Семеновна дьиэ хаhаайката этэ. Володя түөрт оҕоттон саамай кырабыт этэ. Бырааппыт аҕатын, эhээтин батан уhун, көнө уңуохтааҕа, кэрэ сэбэрэлээҕэ. Кинисүрдээх аламаҕай майгылаах, дьоңңо үтүө сыhыаннаах, аhыныгас дууhалааҕа. Элбэх доҕоттордооҕо, кинилэргэ куруук көмөлөhө, сүбэлии сылдьара.

Петр Константинович Арылахов — сэрии ветерана,

«Хорсунун иһин» 3 мэтээл кавалера,

Владимир Андросов төрөппүт аҕата.

Анна Семеновна Добронникова-Андросова.

Владимир Андросов төрөппүт ийэтэ

Тустууга уhуйбут бастакы тренердэринэн Бравин Дмитрий Григорьевич, Турнин Алексей Егорович этилэрэ. 1965 сыллаахха үчүгэй тустуук тахсыыhы диэннэр, Чурапчыга интернат-оскуолаҕа үөрэттэрэ ыыппыттара. Онно аатырбыт тренерга Дмитрий Петрович Коркиңңа дьарыктаммыта. Володя тустуук быhыытынан үүммүтэ, сайдыбыта, тустууга талана биллэн барбыта. Чурапчыга 10-с кылааска үөрэнэ сылдьан, 18 сааhын туола да илигинэ, аатырбыт тустууктары кытта Дьокуускайга тустан кыайталаабыта. 20 сааhыгар ССРС спордун маастарын нуорматын толорбута. 1968 сыллаахха Майаҕа буолбут Манчаары Баhылай бирииhигэр спорт национальнай көрүңнэригэр I Спартакиадаҕа хапсаҕайга абсолютнай чемпион буолбута. Оройуонун, Саха сирин чиэhин элбэхтик көмүскээбитэ. Дойду араас куораттарыгар күрэхтэhэрэ, үксүн бастыыра. Кини кыайыытын-хотуутун туоhулуур элбэх ахсааннаах наҕараадаларын ааҕан сиппэккин. Ийэ дойдутугар ытык иэhин толорон саллааттыыр кэмнэригэр даҕаны, СГУ-га история факультетыгар үөрэнэ сылдьан да наар күрэхтэhиилэргэ кыттара.

Бырааппыт Володя сүрүн ситиhиилэрэ:

• 1966с. Саха АССР норуоттарын V Спартакиадатыгар II миэстэ, «Бастың техника иhин» бириис хаhаайына;
• 1966, 1967, 1974сс. «Урожай» ДСО Уобаластааҕы Сэбиэтин 3 төгүллээх чемпиона;
• 1967с. Куба-РСФСР-САССР сүүммэрдэммит хамаандаларын матчевай көрсүhүүлэрин кыайыылааҕа;
• 1967с. Али Алиев бирииhигэр Бүтүн Союзтааҕы турнирыгар III миэстэ, «Бастың техника иhин» бириис хаhаайына;
• 1967, 1968, 1969 сс. «Урожай» ДСО Россиятааҕы Сэбиэтин 3 төгүллээх чемпиона;
• 1967, 1969, 1971, 1972сс. Дальнай Восток зонатын 4 төгүллээх кыайыылааҕа;
• 1968с. Ыччаттар Бүтүн Россиятааҕы Оонньууларын кыайыылааҕа;
• 1968с. Иван Поддубнай Кубогын хаhаайына;
• 1968с. Манчаары Баhылай бирииhигэр спорт национальнай көрүңнэригэр I Спартакиадаҕа хапсаҕайга абсолютнай чемпион;
• 1969с. Крилатий Димо бирииhигэр норуоттар икки ардыларынааҕы турнир кыайыылааҕа;
• 1969, 1971, 1973сс. ССРС тыатын сирин спортсменнарын 3 төгүллээх чемпиона;
• 1969, 1970, 1974 сс. Саха АССР чемпионатын зонатын 3 төгүллээх кыайыылааҕа;
• 1969с. ССРС чемпионатыгар – VI миэстэ;
• 1971с. РСФСР чемпионатыгар – V миэстэ;
• 1971с. Чита куорат аhаҕас түhүлгэтин чемпиона;
• 1972с. Советскай Союз Геройа Базар Ринчинов бирииhигэр Бүтүн Союзтааҕы турнир чемпиона;
• 1972с. Саха АССР тэриллибитэ 50 сылыгар аналлаах Бүтүн Союзтааҕы турнир кыайыылааҕа;
• 1972с. Чита уобалаhын чемпиона;
• 1973с. Чита уобалаhын Даурия станциятыгар сулууспалыы, онтон СКА-19 эрчиллэ сылдьан, Забайкальскай Байыаннай уокурук классическай уонна көңүл тустууларга чемпиона;
• 1974с. Саха АССР чемпиона;
• 1975с. РСФСР норуоттарын VI сайыңңы Спартакиадатын Дальнай Востоктааҕы күрэхтэhиитин үрүң көмүс призера.

Биhиги күндү оҕобут Володя күөгэйэр күнүгэр сылдьан, эдэр сааhыгар орто дойдуттан баран, сүрэхпитин ытаппыта. Баара буоллар, быйыл 75 сааhын туолуо этэ. Кини хас биирдии кыайыыта биhиэхэ улахан үөрүүнү, үчүгэй өйдөбүлү, киэн туттууну хаалларбыта. 1991 сылтан Тааттаҕа бырааппыт Владимир Андросов бирииhигэр республика турнира бастаан көңүл тустууга, онтон СР спордун маастара нуормалаах хапсаҕайга турнир сылын аайы ыытыллар. Игидэйгэ спортивнай саалаҕа кини аатын иңэрбиттэрэ. 2012 сыллаахха Володябыт олоҕун көрдөрөр суруйуулары, ахтыылары, хаартыскалары хомуйан, Анатолий Мурунов «Андрос» диэн кинигэни таhаарбыта. Тапталлаах бырааппыт Владимир Петрович аатын үйэтитиигэ күүс-көмө, өйөбүл буолар тэрийээччилэргэ, доҕотторугар, спонсордарга, туhааннаах салайааччыларга биhиги дириң махталбытын тиэрдэбит, үчүгэй үлэни, дьоллоох олоҕу баҕарабыт!

Суруйда бииргэ төрөөбүт эдьиийэ Анна Петровна Арылахова, үлэ ветерана, Саха Республикатын «Ытык Сүбэ» бэлиэ хаhаайына,  сэрии сылын оҕото.

2022 сыл, Игидэй, Таатта.

Андрос / [хомуйан оҥордо А. Г. Мурунов]. — Дьокуускай : Бичик, 2012. — 216 с.

Саха орто көлүөнэ тустууктарыттан биир бастыҥнара, ССРС, РСФСР тыатын сирин спортсменнарын үстүү төгүллээх чемпиона, Манчаары Баһылай 1-кы Спартакиадатын хапсаҕайга бастакы абсолютнай кыайыылааҕа, ССРС, Саха АССР спордун маастара Владимир Петрович Андросов төрөөбүтэ 65 сылыгар уонна кини сырдык кэриэһигэр ананар. Кинигэҕэ кини кылгас олоҕун көрдөрөр суруйуулар, ахтыылар, хаартыскалар киирдилэр.