Загрузка...
Убаастабыллаах ааҕааччыларбыт!
Игидэй нэһилиэгэр бу күннэргэ олус суолталаах, кэтэһиилээх, дириҥ ис хоһооннох биир дойдулаахпыт үөрэх, доруобуйа, социальнай харалта наркома, учуутал, суруналыыс, тылбаасчыт Алексей Федотович Бояров төрөөбүтэ 125 сылыгар анаммыт «Норуот сырдык кэскилин түстээччи — А. Ф. Бояров» диэн 2 томнаах саҥа кинигэ күн сирин көрдө.
Кинигэни хомуйан оҥордо Саха Өрөспүүбүлүкэтин үөрэҕириитин систематын туйгуна, «Үйэтитиигэ бастыҥ үлэ (2020 с.)»анал аат хаһаайына, Э. К. Пекарскай аатынан Игидэй орто оскуолатын педагог-библиотекара Попова Гизелла Софроновна.
Кинигэҕэ Таатта улууһун Игидэй нэһилиэгиттэн төрүттээх Саха Автономиятын олохтоспут, биллиилээх государственнай деятель А. Ф. Бояров олоҕун, айымньылаах үлэтин туһунан ыстатыйалар, ахтыылар, ону таһынан кини кэмин уонна сэбиэскэй кэм саҕанааҕы Игидэй нэһилиэгин устуоруйата, ханна да бэчээттэммэтэх ахтыылар, сэдэх докумуоннар, хаартыскалар икки томнаах кинигэлэргэ түмүллэн киирбиттэр.
Аныгы олох тэтиминэн QR код нөҥүө кинигэ электронннай матырыйаалларын көрүөххэ сөп.
Үйэлээх үлэни оҥорбут кинигэ ааптарыгар Гизелла Софроновнаҕа, кинигэ күн сирин көрөрүгэр үлэлэспит дьоммутугар истиҥ махталбытын тиэрдэбит.
Убаастабыллаах ааҕааччыларбыт, кинигэни нэһилиэк библиотекатыттан уларсан ааҕын, сэҥээрин диэн ыҥырабыт.
