1 Star2 Stars3 Stars4 Stars5 Stars (2 votes, average: 3,50 out of 5)
Загрузка...
908 views

Игидэй нэһилиэгин Герой Ийэлэрэ

Ийэ – ытык өйдөбүл. Ийэттэн саҕаланар киһи төрдө, аал уот, алаһа дьиэ. Кинини кытта биһиги саамай истиҥ, сырдык иэйиилэрбитин ситимниибит. Ийэбит мөссүөнүн хас биирдиибит сүрэхпитигэр илдьэ сылдьабыт

Федорова Татьяна Пудовна
(1922-2007
сс.)

1922 сыллаахха Таатта улууһугар Дьиэрэннээх нэһилиэгэр  Пуд Степанович, Дария Егоровна Дуолановтар дьиэ-кэргэнигэр төрөөбүтэ. Бииргэ төрөөбүт ахсыалар этэ. Ийэлэрэ эрдэ өлөн, аҕалаах эбэтэ ииппиттэрэ.  14 сааһыттан араас үлэҕэ үлэлээн барбыта.  1946 сыллаахха Федоров Михаил Михайловичка кэргэн тахсыбыта. Уон оҕоломмуттара, 6 уол, 4 кыыс. 24 сиэн, 39 хос сиэн,  2 хос-хос сиэннэрдээх.

Татьяна Пудовна 14 сыл устата Кулаадаҕа ыанньыксыттаабыта. Кэлин Дэбдиргэҕэ көһөн кэлэн детсадка ньээнкэнэн үлэлээбитэ.

Наҕараадалара:

«Герой Ийэ» орден

«Ийэҕэ албан аат» I, II, III-с степеннэрдээх орден

«Ветеран тыла» мэтээл

«1941-1945 сс.Аҕа дойду  Улуу сэриитигэр килбиэннээх үлэтин иһин» мэтээл

«Ветеран труда» мэтээл.

Матаннанова Мария Семеновна
(1938-2015
сс.)

1938 сыллаахха балаҕан ыйын 3 күнүгэр Таатта улууһун Баайаҕа нэһилиэгэр күн сирин көрбүтэ.  Кыра оҕо сылдьан тулаайах хаалбытын, наһаа эринньэх кыыһы аймахтара Василиса уонна Егор Нестеровтар иитэ ылан Хабарга көһөрөн аҕалаллар. Оҕо эрдэҕиттэн ыарыһах буолан уонна нэһилиэктэн ыраах олорор буолан оскуолаҕа үөрэммэтэҕэ. 8-9 сааһыттан сайын оҕус сиэтэн дьонугар окко  көмөлөһөрө. 14 сааһыттан холкуоска ыанньыксытынан киирэн үлэтин саҕалаабыта.

1957 с. олоҕун аргыһын Матаннанов Иван Харитоновиһы көрсөн ыал буолбуттара. 12 оҕоломмуттарыттан уоллаах кыыс кыра саастарыгар олохтон туорууллар, онон 10 оҕону иитэн, үөрэтэн атахтарыгар туруорбуттара, үлэһит дьон оҥорбуттара. 58 сыл бииргэ олорбуттара. 28 сиэн, 46 хос сиэннэммиттэрэ.

Мария Семеновна холкуос ыарахан үлэтигэр 16 сыл бэриниилээхтик үлэлээбитэ. Кэлин өр сылларга оскуолаҕа уборщицанан уонна интернакка таҥас сууйааччынан үтүө суобастаахтык үлэлээбитэ.

Наҕараадалара:

«Герой Ийэ» орден

«Ийэҕэ албан аат» I, II, III-с степеннэрдээх орден

«Үлэ ветерана» мэтээл.

 

Лопатина Анастасия Николаевна
(1935-2020
сс.)

1935 сыллаахха балаҕан ыйын 3 күнүгэр Таатта улууһун Томтор нэһилиэгэр Ивановтар дьиэ кэргэҥҥэ төрөөбүтэ. Сэрии кэмигэр ииппит ийэтэ Мотуруона Быгынановалыын холкуос сүөһүтүн көрсөн улааппыта.

1952 сыллаахха Дэбдиргэҕэ Владимир Алексеевич Лопатинныын ыал буолбуттара, 11 оҕону төрөтөн, көрөн, иитэн улаатыннарбыттара, үөрэхтээбиттэрэ.

Анастасия Николаевна оҕо саадыгар ньээҥкэнэн, кулуупка муоста сууйааччынан, кэлин оскуолаҕа, интернакка поварынан үлэлээбитэ.

Наҕараадалара:

«Герой Ийэ» орден (1979с.);

««Ийэҕэ албан аат» I, II, III-с степенэ;

«Знак Высшей благодарности Матери»;

«1941-1945 сс. Аҕа дойду Улуу сэриитигэр килбиэннээх үлэтин иһин» мэтээл;

«Ветеран тыла» мэтээл;

Улуу Кыайыы 60, 65, 70, 75 сылларынан үбүлүөйнэй мэтээллэр

«Дети войны» мэтээл;

«Почетный старейшина РС(Я)»знак;

«Игидэй нэһилиэгин Ытык кырдьаҕаһа» знак;

«Игидэй нэһилиэгин бочуоттаах олохтооҕо»;

«Үлэ ветерана» мэтээл;

«Золотые семьи Якутии» кинигэҕэ киирбитэ.

 

Аргунова Мария Константиновна

1938 сыллаахха муус устар ыйга Санды алааска Евдокия Егоровна Нестерова, Константин Ильич Тарасов дьиэ кэргэттэригэр иккис оҕонон күн сирин көрбүтэ. Ийэтэ эрдэ өлөн, аҥардас аҕа иитиитинэн улааппыта.

14 сааһыттан холкуоска үлэлээн барбыта. Сайын от үлэтигэр, саас ыһыыга, кыһынын субан сүөһү көрүүтүгэр сылдьыбыта.

1961 сыллахха Иван Корнилович Аргуновтуун ыал буолбуттара.  11 оҕону көрөн-истэн, улаатыннаран, ыал, үлэһит дьон оҥортоон, эбээ, эһээ, хос эһээ, хос эбээ буолар дьолун билэн, 2011 сыллаахха бииргэ олорбуттара 50 сыла туолан «Дьол кинигэтигэр» киирбиттэрэ.

Мария Константиновна олоххо активнай позициялаах, нэһилиэккэ ыытыллар тэрээһиннэрэгэ көхтөөхтүк кыттар, «Амсай» асчыттар түмсүүлэрин биир солбуллубат кыттыылааҕа, сыана бэтэрээнэ, ветераннар спартакиадаларыгар нэһилиэк чиэһин элбэхтэ көмүскээбитэ.

Наҕараадалара:

«Герой Ийэ» орден

«Ийэҕэ албан аат» I, II, III-с степеннэрдээх орден

«Сэрии сылын оҕото» мэтээл;

«Ветеран труда» мэтээл.

«Таатта улууһа төрүттэммитэ 100 сылынан» үбүлүөйнэй мэтээл

«Игидэй нэһилиэгин бочуоттаах олохтооҕо».

 

Иванова Мария Ивановна

1953 сыллаахха алтынньы 21 күнүгэр Игидэй нэһилиэгэр төрөөбүтэ.  1972 с. Игидэй орто оскуолатын бүтэрэн “Ньылла” ферматыгар субан сүөһү көрүүтүгэр, кэлин совхозка ыанньыксытынан үлэлээбитэ. 1973 с. Роман Романович Ивановтуун ыал буолан, 12 оҕону төрөтөн, 1986 с. «Герой Ийэ» үрдүк ааты ылбыта.

2000 с. пенсияҕа тахсыбыта. Мария Ивановна үлэлиир кэмнэригэр элбэх грамоталарынан, махтал суруктарынан наҕараадаламмыта.

Наҕараадалара:

«Герой Ийэ» орден

«Ийэҕэ албан аат» I, II, III-с степеннэрдээх

«Үлэ ветерана» мэтээл

2016 с. «Игидэй нэһилиэгин бочуоттаах олохтооҕо» анал аат